Шаркаўшчына больш не самая бедная. Топ-10 раёнаў Беларусі з нізкімі і высокімі заробкамі

Сярэдні заробак беларусаў у чэрвені склаў 738,7 рубля. Рост у параўнанні з маем — амаль на 20,5 рубля. Намінальны заробак павялічваецца ўжо трэці месяц запар. Але гэты рост ідзе ў розных рэгіёнах нераўнамерна. Шаркаўшчынскі і Ушацкі раёны, якія знаходзіліся ад пачатку года ў хвасце зарплатнага рэйтынгу, — змаглі нарэшце пераламаць тэндэнцыю.

У дзясятцы раёнаў з самымі нізкімі заробкамі не аказалася ніводнага рэгіёну, дзе заробак дацягнуў хоць бы да 500 рублёў. Пры гэтым самая маленькая сярэдняя зарплата — ніжэй 460 рублёў — цяпер не ў Шаркаўшчыне, а ў Лоеве і ваколіцах. Хоць былы антылідар са спісу самых бедных раёнаў усё адно не выйшаў.

А вось сапраўдны поспех прадэманстраваў Ушацкі раён, які нават не патрапіў у рэйтынг найменшых заробкаў. У чэрвені там у сярэднім плацілі 503 рубля (у маі — каля 480). Праўда, сакрэт поспеху просты — статыстыка ўлічыла адпускныя, якія выплацілі работнікам.

Акрамя таго, антырэйтынг папоўнілі адразу некалькі навічкоў: Міёрскі, Шумілінскі, Глускі, Ельскі, Браслаўскі і Брагінскі раёны.

Самым жа «багатым» рэгіёнам па традыцыі стаў Салігорскі раён, які абышоў па дадзеным паказчыку нават горад Мінск. Нядрэнныя заробкі былі ў Дзяржынскім і Мінскім раёнах — прыкладна па 800 і 900 рублёў.

Таксама выгадна жыць у Рэчыцы, Смалявічах і Мазыры. Характэрна, што перадапошнім у рэйтынг паспеў ускочыць Астравецкі раён, дзе цяпер ідзе будоўля Беларускай атамнай электрастанцыі. Там у сярэднім плацяць амаль 675 рублёў.

Дарэчы, калі ўлічыць статыстыку па абласных цэнтрах і гарадах абласнога падпарадкавання, то высокія зарплаты таксама былі ў Наваполацку, Жодзіне, Гродне, Брэсце і Гомелі. Там у чэрвені людзі атрымлівалі ад 700 да 800 з лішнім рублёў.